حبايبي، متصعبوش الموضوع على نفسكم وتتوهموا المرض النفسي، وحاولوا تعبروا كويس بالألفاظ الدقيقة عن ضغطكم النفسي واحتياجاتكم بدون خجل وكسوف. يعني ببساطة، روحي لحد بتحبيه وادخلي على الشات قوليله أنا مش بخير، ومحتاجة أشوفك دلوقتي ندردش سوا، ونحضن بعض مرتين، في بداية ونهاية اللقاء!
وهي ديه روشتة العلاج.
ربنا يكفيكم جميعاََ شر المرض النفسي، قبل ما تفكري تروحي لدكتور نفسي وتطلبي علاج نفسي، اسألي نفسك الأول، امتى آخر مرة اتكلمت من قلبي مع حد فاهمني وطبطب عليا في نهاية الحديث وقالي مش هسمحلك تكوني بالحالة ديه وأنا موجود؟
طبعا لو إحساس الكوميديا السوداء لبسك دلوقتي، وعينك رغرغت بالدموع، وقولتيلي:ياااه ده أنا من ساعة ما جيت الدنيا وأنا منتظرة المشهد ده يحصل في حياتي!
هقولك لا ياحزينة، فيه ناس كتير منتظره من سيادتك رسالة من جملة واحدة مباغتة تقول فيها: ليك وَحشة .. بقالنا زمن متكلمناش، ماتيجي نتقابل؟
بس أنت محبكة الموضوع حبتين، وخايفة تتحرجي ومكسوفة من رد الفعل، صح؟! أبوس راسك كوني رخمة وتنحة، و تعالى على نفسك، وجربي تقول الجملة اللي فوق ديه لحد بتأنسي بوجوده، وشوف النتيجة بعد اللقاء! ويا سلام بقا لو يكون عندك حِس أدبي كدا وتستخدمي تعبير بلاغي، زي الأستاذة أحلام مستغانمي وتفتحي الرسالة ب "عليك اللهفة".
بس تحذير هام، لو الشخص تافه ومش عميق، بلاش تجويد عشان ممكن يشتمك، خشي في الموضوع على طول عشان ميقفلش فرحتك.
كاتب فاتح شهية: الصوفية حنان
__
Photo Credit: pinterest.com
0 تعليقات